TIRANE-Me rastin e ditës së të dashuruarve, në 14 shkurtin e Shën Valentinit, Bashkia e Tiranës organizoi një sërë aktivitetesh, të cilat e bënë edhe më të veçantë ditën për shumë të dashuruar.

Në mjediset e Parkut Rinia qindra të rinj, në mënyrë simbolike, vendosën nga një dryn në instalacionin prej zemre të vendosur nga Bashkia e Tiranës, ku nuk munguan as fotot. Ashtu sikurse të rinjtë në qytetet e tjera evropiane, edhe në Tiranë, të dashuruarit i premtuan njëri-tjetrit dashurinë e përjetshme.

E kthyer tashmë në një traditë, qindra çifte zgjodhën që të kalojnë disa momente të bukura në kodrat e Parkut, duke shijuar dekorin e veçantë të realizuar nga Agjencia e Parqeve dhe Rekreacionit të Bashkisë së Tiranës.